فتاة في 18 عشر من عمرها تروي قصة من حياتها وانظر الى الالم الذي عايشته قصة لموقع مااجمل الفتاة بلحجاب 2017

فتاة في 18 عشر من عمرها تروي قصة من حياتها وانظر الى الالم الذي عايشته قصة لموقع مااجمل الفتاة بلحجاب 2017
الجزا الاول:

عمري 18 سنة انا بنت بحال كاع البنات كنتقاسم معاكم الاحلام الاماني الهوايات وكاع الحوايج لي يقدرو يعجبو اي بنت ,انا شديت الباك هاد العام ماقادراش على المسؤولية ديال القراية وبزز باش شديتو كيبان ليا غير كنضيع الوقت منلي بدات حياتي تربيت فعائلة محافظة عائلة كبيرة بالزاف حنا ميسورين والحمد لله ولكن النظام صعيب عندنا فالدار ممنوع على البنات الخروج والدخول كلشي خواتاتي لي كبر مني خرجو من الالاعدادي وتزوجو انا لي كنت صغيرة فيهم خلاوني شديت الباك بستة وستين كشيفة انا بنت زوينة بالزاف وكانو البنات كيحسدوني على الزين لي عطاني الله بيضة وفورمتي زوينة لدرجة كاتجيب ليا المشاكيل فالزنقة شعري تحت ضهري حيت ممنوع نقطعو وعينيا كبار ما عشتش المراهقة ديالي بحال البنات ماكانش عندي الحق نبغي اولا نتعجب بشي حد حيت من صغري وملي حليت عينيا على هاد الدنيا و انا مخطوبة لانسان مكنعرفوش ارتبطت بيه فاش كت فكرش ماما وعرفو بلي غانتزاد بنت خطبوني لولد خالتي جواد ماكانعرف عليه والو من غير بعض الدكريات لي مازال كانعقل عليها فالصغر كان كبر مني بسبع سنين كانعقل كانت عندي ربع سنين كايصاوب معايا التمارين وكايديني للمدرسة ولكن فاش وصلات عندو 20 عام هاجر لامريكا يكمل قرايتو وبما ان عائلة خالتي كايسكنو فمدينة الرباط فماكانتلاقاوش واحد المرة فاش منت كنقرا فالسانكيام جا عندنا فعيد الفطر ومن تما ما شفتو غادي تسولوني علاش قبلت بهادشي نتزوج بواحد بدون الارادة ديالي بشخص مكنعرفوش فاش كيفكر ولا كيفاش دايرة نظرتو للحياة غانجاوبكم بلي معنديش اختيار عائلتي صعيبة بالزاف .فواحد النهار من شهر 6 قالوليا عائلتي بلي العرس غايكون فشهر 8 وبلي خاصني نوجد راسي حتى تجهيزات العرس والملابس الداخلية وكلشي ماما وخواتاتي الكبار لي ختاروه ماكانتش عندي دراية بدوك الحوايج كيفما كنقولو كنت ....….. يتبع
الجزء_ 2 :
رمانة مغمضة المهم الوقت داز بالزربة وانا مامسوقاش يعني ماشي بحال شي عروسة مابقاتليها غير سيمانة وتتزوج كنت طالقة السمطة ماعارفاش اش كيتسناني من بعد اوا شنو ندير حتا خطيبي ماكانش عندي الحق نهضر معاه اولا نشوفو بحكم التقاليد بابا كيقول مامن حقكم تلاقاو حتى تولي ديالو وكاع ديك الضسارة ديال الافلام معندنا منديرو بيها ... وصل النهار فاش غنكتبو كتابنا انا بطبيعت الحال وجدت راسي قبل داوني للحمام والكوافورا وكلشي ماكانتش الخدمة بالزاف حيت الله عطاني جمال رباني خالتي هدات ليا واحد التكشيطة زوينة فالبلون كاسي كلها منبتة باينة فيها غالية بالزاف وقالتليا نلبسها ونوجد راسي حيت العدول غايجي للدار وكانت هاديك اول مرة نشوف راجلي لي من شحال هادي كنسمع بيه غير فالحكايات  لبست التكشيطة طليت فالمراية الكبيرة لي قدامي وااااو هادي انا؟ وليت خطيرة حنيكاتي ولاو غوز بحمام البخار لي داروليا وشعري زاد كحال وقوا صراحة عجبني راسي بالزاف وحتى المكياج لي دارت ليا الكوافورة كان متقون مزيان ماسخيتش براسي تميت نبقا نشوف ولكن فديك اللحظة دقات ماما عليا وقالت ليا بلي الناس جاو وجواد كيتسنى كنا عارضين على العاءلة حيت هدا نهار ضريب الصداق ومازال العرس من بعد ماما فاش شافتني تغرغرو عينيها بالدموع واخا مبغاتش تبين وبقات كاتقرا عليا انا معارفاش باش منت كانحس احساس غريب احساس بالمجهول واخا هكداك كان فقلبي دافع قوي نشوف جواد درت الزيف ديالي لي جا منفوخ فوق المشطة ونزلت والعيالات كايزغرتو ....….. يتبع

الجزء_ 3 :

وكلشي فرحان واخيرا شفت جواد...تبدل بالزااااف اويلي هادا هو؟ كان كيبان بداك الكوستيم بحال شي ممثل طويييل وكتافو عرااض وجسمو رياضي وشعرو كحل و عندو لحية خفيفة انا تزنكت ومابقيت عارفا ماندير فداك الموقف انا دبت فديك اللحظة راجلي زوين بالزاف حمقني بعدا حمدت الله وشكرتو جواد كان حشمان حتى هو واخا هكداك بقا كيشووفيا واحد النظرات عندو كدوب اا متاكدة بلي حمقتو كتبنا كتابنا و مشاو الناس وقالينا بابا بلي عندنا الفرصة نهضرو شوية باش نتعرفو كتر على بعضياتنا غير دخلنا للبيت مشات ديك الحشمة لي كانت كاتبان عليه قرب مني وبقا كيشووفليا فعينيا انا دخت حشمت تمنيت مانكونش فداك الوقت هادا مالو غادي وكيقرب تخلعت وهو يجر ليا الزيف لي كنت دايرة على راسي فاجاني بالشجاعة ديالو جاتني البكية وقاليا"ماتخافيشا خولة انا دابا وليت راجلك ماخاصكش تحشمي مني "غير بدا يقرب وانا نعطيها للبكا وكانبكي بالجهد دارنا تخلعو وحتى هو مافهم والو قاليه بابا من الاحسن تعطيها وقت حيت حشومية بالزاف مشا فحالو وغير مشا تجمعو عليا خواتاتي وبنات العائلة كايمدحو فالجمال ديالو والشخصية القوية وكلشي انا ماكنتش مسوقة كانت فيا الخلعة بالزاااف كنت كانفكر فالنهار فاش غانكون بين يديه وانا معندي حتى ثقافة او خبرة دازت سيمانة ووصل يوم العرس درناه فالفيلا ديال جدي كلشي العائلة حضرات والناس فرحانين كلشي كايزغرت ويشطح انا طلعت كانحمق فالعرس بشهادة الجميع جينا مواتيين حيت بجوج بينا اية فالجمال هو مرة مرة كايغمز ليا ....….. يتبع

الجزء_ 4 :

وكايضحك وانا شاداني التقفقيفة من ديك الليلة لي كلشي كايخلعني بيها بحكم ان عائلتي محافظة بالزاف ماكانش عندي انفتاح على العالم ماكنتش كانعرف شي حاجة سميتها ثقافة جنسية غير ان الراجل كيدخل بمرتو وكايخرج الدم وكاتعدب مسكينة وايلا ماخرجش الدم كايطلقها كانت ديك الليلة كاتبانليا بحال شي كابوس كانتسناه ايمتا غير يدوز على خير سالا العرس وركبت مع راجلي فالطوموبيل كان القرار ديال جواد ندوزو اول ليلة ديالنا فالباطو ليغانسافرو بيه لباريس ندوزو شهر العسل هادشي زاد وترني اكثر حيت اول مرة غانخرج من المغرب وصلنا من بعد ما ودعنا العائلة حسيت بواحد الاحساس مايمكنش نوصفو انا متاكدة بلي اي وحدة مزوجة هنايا غاتكون حسات بيه فارقت والديا وخوتي بالدموع تمنيت كون ماكبرتش كون بقيت صغيورة ديما حداهوم كان الحزن كايبان على وجهي فاش وصلنا لحدا الباطو نزلنا من الطوموبيل جا جواد وقف قدامي طلع ليا وجهي بيديه وقاليا "انا عارفك خايفة مني عندك الحق نتي ماكاتعرفينيش مزيان ولكن اخولة كنحلفليك فهاد الليلة باالي الايام لي غادوزيها معايا غاتكون اجمل ايام حياتك" وماعرفتش كيفاش دار جرني لعندو وعنقني قدام الناس قدام الباطو انا كنت غادي نطيح شميت الريحة ديال البارفان ديالو نفس الريحة لي كان داير نهار الزواج كنت كنوصليه لصدرو حيت طويل عليا بالزاف كنحس بيديه فوق ضهري المشاعر تخلطو عليا عمرني ماكان كيصحابليا بلي الزواج كايخليك تحسي بهاد الشي كامل بلي راكي فالحضن ديال واحد الانسان لي هو راجلك وانك ماكاديري حتى حاجة خايبة ايلا قربتي ليه كنت كانحس بالانفاس ديالو وهو معنقني وانا ساكتا قلبي كان غايخرج من بلاصتو مافقت من الدهشة حتى طلعنا للباطو كان كبير ....….. يتبع